Ar steuñv lec’hel a gêraozañ eo an teul pennañ deuet eus al lezenn war ar c’hengred ha nevezerezh ar c’hêrioù eus miz Kerzu 2000. Kemer a ra an SLK plas ar steuñv tiraozañ (ST), ha klask a ra mont pelloc’h eget hennezh. Ur raktres hollek evit terkañ ha diorren tiriad kêr war hir dermen zo anezhañ. Da-heul an teul-se e teuy raktresoù kêr Garaez da wir e-pad un dek bloavezh bennak.

Ar ST zo o ren er mare-mañ a oa bet aprouet e 1998. Ne jaoj ket ken, rak kemmoù bras zo bet war douar hor c’humun. Setu e oa dav adwelet anezhañ evit bastañ da ezhommoù an dud ha bed an armerzh. Krog e oad gant an adwel-se d’an 21 a viz Genver 2002.

Ret eo kaout un aotre sevel evit nep savadur, forzh pelec’h e vefe, forzh peseurt implij a vefe lakaet dezhañ, forzh piv e vefe mestr an oberiadur anezhañ. Ne vern pe ez eus diazezoù dezhañ pe n’eus ket.

Evel-se e ranker kaout un aotre sevel evit labourioù war savadurioù zo anezho dija pa zeufe war-lerc’h ar re-se ur c’hemm implij, ur c’hemm neuz pe ur c’hemm ec’honder :

	labourioù brasaat
	kemm implij
	terkañ ar galatrez (en tu-hont da 20 m²)
	sevel ur c’harrdi (en tu-hont da 20 m²)
	sevel un adti, ur veranda (en tu-hont da 20 m²)
	poulloù-neuial toet

Teulioù da bourchas :

	tres lec’hiañ an dachenn
	tres lec’hiañ ar savadurioù da sevel pe da gemmañ e-keñver an dachenn
	tresoù an talbennoù
	Ur skejenn, pe meur a hini, a ziskouez pelec’h e vo staliet ar savadur e-keñver an dachenn naturel
	2 luc’hskeudenn evit lec’hiañ an dachenn en dremmvro
	1 dresadenn evit prizañ neuz ar raktres en endro
	tresoù eus an holl solieradurioù ha talbennoù, skejennoù
	1 notennig evit prizañ arvez ar raktres.
	Ar studiadenn skog pa c’houlenner anezhi

Ret eo diskouez an aotre sevel war an dachenn. Graet e vez gant an hini en deus bet an aotre, war-bouez ur banell brasoc’h eget 80 cm a rank chom war al lec’h keit ha ma pad al labourioù.

Diwallit, evit ar raktresoù en tu-hont da 170 m², e ranker implijout un tisavour.

Termen pourchas : 2 viz, ha muioc’h ma vez kuzuliataet servijoù

Evit ar re-mañ, n’eo ket ret kaout un AS hogen ober un disklêriadur labourioù a ranker :

	nep kemm war an talbenn (indu, cheñch ar prenestroù hag an dorioù, tuellennoù ar siminalioù, kili)
	an digorioù war an toennoù (vélux, lomberioù)
	nep fichadur diabarzh a grou ur GMOK (gorread e-maez an oberenn griz) dindan 20 m²
	nep savadur diavaez (karrdi, goudor liorzh, atalier, tiez-gwer)
	verandaioù (dindan 20 m²)
	poulloù-neuial disto

Ret eo diskouez an disklêriadur labourioù war an dachenn, evel evit an AS.

Teulioù da bourchas :

	tres lec’hiañ an dachenn
	tres lec’hiañ ar savadurioù da sevel pe da gemmañ e-keñver an dachenn
	tresoù an talbennoù da sevel pe da gemmañ
	luc’hskeudennoù a ziskouez stad an traoù
	mar bez anv eus ur gael : brastres (mentoù, natur an dafar)

Termen pourchas : 1 miz, ha muioc’h ma vez kuzuliataet servijoù diavaez

Teulioù da bourchas :

	tres lec’hiañ an dachenn
	tres lec’hiañ ar savadur e-keñver an dachenn, gant ar muzulioù e 3 ment.

Ret eo spisaat ivez en teuliad :

	an implij a vez graet eus ar savadur bremañ, ar gorread plañchod e-maez an oberenn rik, abegoù al labourioù
	evit an dismantrañ darnel, natur ha doare al labourioù zo ezhomm.

Termen pourchas : 4 miz

Un akta melestradurel kelaouiñ eo an testeni kêraozañ.

Dleet eo dezhañ pourchas d’an implijer (perc’henn, saver, lodenner, h.a.) un toullad titouroù ha respontoù d’ar goulennoù a sav outañ e-unan diwar-benn ar pezh a c’haller ober war an dachenn-mañ-tachenn ha penaos e c’hall bezañ implijet, da skouer :

	ha posupl eo sevel ti war an dachenn-mañ ?
	peseurt aveadurioù zo da gaout (dour, tredan, hentoù) ?
	penaos e c’haller sevel ti, petra eo ar reolennoù da zoujañ dezho ?

Teulioù da bourchas :

	tres lec’hiañ an dachenn
	tres an dachenn
	notennig deskrivañ berr diwar-benn ar pezh emeur e soñj d’ober

Termen pourchas : 2 viz

N’eo ket an testeni kêraozañ un aotre. Daou akta disheñvel eo an testeni kêraozañ hag an aotre sevel. Koulskoude eo an testeni kêraozañ un akta hag a grou gwirioù.

Ul lodennaoueg a c’hoarvez eus nep rannadur eus ur font e-sell da sevel tiez, pa vez da bal gant ar rannadur-se, pe pa c’hoarvez war e lerc’h, en ur ober nebeutoc’h eget 10 vloaz, e ve ouzhpenn 2 dachenn diwar ar font-se.

Teulioù da bourchas :

	tres lec’hiañ an dachenn
	tres eus an dachenn evel m’emañ bremañ hag eus an ardremez anezhi
	notennig a zeskriv an oberiadenn hag ar palioù anezhi
	raktres reoliadur m’emeur e-sell da glokaat ar reolennoù kêraozañ zo o ren
	tres aozañ
	programm ha tresoù al labourioù
	doareennoù merañ an aveadurioù boutin
	teul dremmvro
	studiadenn skog (pa vez anv eus oberiadennoù en tu-hont da 5000 m² a GMOK ha pa vezont war diriad ur gumun n’he deus ST ebet hag SLK ebet)